day,
00
month
0000
டெல்லியை சேர்ந்த அஷயானாய் ராய் என்ற பெண் கடந்த 2018ஆம் ஆண்டில் தனது முடியை திருத்திக் கொள்வதற்காக ஐடிசி மவுரியா ஹோட்டலில் உள்ள அழகு நிலையத்துக்கு சென்றுள்ளார். வழக்கமாக அப்பெண்ணுக்கு முடி திருத்தும் நபர் இல்லாததால், வேறு ஒருவர் அப்பெண்ணுக்கு முடி திருத்தம் செய்துள்ளார்.
தனது நீண்ட கூந்தலில் இருந்து நான்கு அங்குலம் அளவுக்கு மட்டும் முடியை வெட்டுமாறு அப்பெண் கூறியுள்ளார். ஆனால், முடி திருத்தும் நபரோ அப்பெண்ணின் மொத்த முடியின் நீளமே 4 அங்குலம் உள்ளது போல வெட்டியுள்ளார். முடி திருத்தப்பட்டதும் இதனைக் கண்டு அதிர்ச்சியடைந்த அப்பெண், சம்மந்தப்பட்ட நிர்வாகத்தினரிடம் புகார் அளித்துள்ளார்.
செய்த தவறுக்கு வருத்தம் தெரிவித்த நிர்வாகம், முடி திருத்தியதற்கு பணம் வேண்டாம் என்று கூறியதாக தெரிகிறது. அத்துடன், அப்பெண்ணின் முடி வளர்வதற்கான சிகிச்சை ஒன்றையும் அளித்துள்ளனர். ஆனால், அந்த சிகிச்சையில் அப்பெண்ணின் முடி மேலும் பாதிக்கப்பட்டுள்ளது. இதனால், மாடலாகும் கணவு சிதைந்து போனதுடன், அவரது பணியும் பறிபோயுள்ளதாக தெரிகிறது.
இதையடுத்து, தனக்கு இழப்பீடு கோரி நுகர்வோர் குறை தீர்ப்பு ஆணையத்தை நாடியுள்ளார். இவரது வழக்கை விசாரித்த தேசிய நுகர்வோர் குறைதீர் ஆணையத்தின் தலைவர் ஆர்.கே.அகர்வால் தலைமையிலான அமர்வு, “தனது முடியை அழகாக வைத்துக்கொள்ள வேண்டும் என்பதற்காக நட்சித்திர ஹோட்டலில் உள்ள முடி திருத்த கடைக்கு அந்தப் பெண் அதிக அளவில் பணத்தை செலவிட்டு சென்றுள்ளார்.
ஆனால், அந்தப் பெண்ணின் நீண்ட கூந்தல் அதிக அளவில் வெட்டப் பட்டதுடன், முடியும் பாதிப்புக்குள்ளாகி உள்ளதால் அவர் மன உளைச்சலுக்கு உள்ளாகி, தனது பணியையும் அப்பெண் இழந்துள்ளார். எனவே தவறான முடி திருத்தம் செய்த காரணத்தால், கடை நிர்வாகம் அந்தப் பெண்ணுக்கு ரூ.2 கோடி இழப்பீடு தொகையை எட்டு வாரங்களுக்குள் வழங்க வேண்டும்” என்று உத்தரவிட்டுள்ளனர்
