ரக்ஷாபந்தனையொட்டி பெண்களுக்கு இலவசப் பேருந்து பயணம் பரிசு! எங்கு தெரியுமா?

ரக்ஷாபந்தனையொட்டி பெண்களுக்கு இலவசப் பேருந்து பயணம் பரிசு! எங்கு தெரியுமா?

சகோதரத்துவத்தை வலியுறுத்தும் ரக்ஷாபந்தன் வருகிற ஆகஸ்ட் மாதம் 11ஆம் தேதி நாடு முழுவதும் கோலாகலமாக கொண்டாடப்படவுள்ளது. இதையொட்டி, ரக்ஷாபந்தன் விழாவின் முக்கிய நிகழ்ச்சியான ராக்கி கட்டுதலுக்கு, கயிரு தயாரிக்கும் பணியில் வடமாநில மக்கள் பலர் ஈடுபட்டுள்ளனர். வெளிநாடுகளில் உள்ள சகோதரர்களுக்கு பெண்கள் தங்களின் வாழ்த்துக்களையும் ராக்கி கயிரையும் பார்சலில் அனுப்பி வருகின்றனர். ரக்ஷாபந்தன் தினத்தில் பெண்கள் தங்களுக்கு பாதுகாப்பு அரணாக இருக்கும் சகோதரர்களுக்கு மரியாதை செய்யும் நிகழ்வாக ராக்கி என்னும் கயிரை கைகளில் கட்டுவார்கள். அவர்களின் அன்புக்கு மதிப்பளிக்கும் வகையில் சகோதரர்கள் பெண்களுக்கு பரிசு பொருட்களை கொடுப்பார்கள். இந்த நிகழ்ச்சி இந்தியா முழுவதும் குறிப்பாக வடமாநிலங்களில் மிகவும் முக்கியமானது. இந்த நிலையில், ராஜஸ்தான் மாநிலத்தில் ரக்ஷாபந்தன் தினத்தன்று அரசு பேருந்துகளில் பெண்கள் மற்றும் சிறுமிகளுக்கு இலவசமாக பயணம் செய்ய சலுகை அளிப்பதாக ராஜஸ்தான் மாநில அரசு அறிவித்துள்ளது. அதேபோல, ஹரியானா மாநிலத்தில் பெண்கள், அரசுப் பேருந்துகளில் 36 மணி நேரம் இலவசமாக பயணம் செய்யலாம் என்று அறிவிக்கப்பட்டுள்ளது. அதன்படி, ஆகஸ்ட் மாதம் 10ஆம் தேதி மதியம் 12 மணி முதல் மறுநாள் 11ஆம் தேதி நள்ளிரவு 12 மணி வரை பெண்கள் இலவசமாக பேருந்துப் பயணம் மேற்கொள்ளலாம் என்ற அறிவிப்பு வெளியாகியுள்ளது. ரக்ஷாபந்தன் பரிசாக இது வழங்கப்படுவதாக அந்தந்த மாநில அரசு கூறியுள்ளது.