சட்டமேதை அம்பேத்கர் பிறந்தநாளை முன்னிட்டு கோயம்பேட்டில் உள்ள அம்பேத்கர் சிலைக்கு மாலை அணிவிக்க விசிகவினரும், பாஜக கலைப்பிரிவு நிர்வாகி காயத்ரி ரகுராம் தலைமையில் அக்கட்சியைச் சேர்ந்தவர்களும் வருகை தந்தனர். அப்போது அம்பேத்கர் சிலை முன்பாக இருந்த பாஜக கொடியை அகற்றிவிட்டதாக பாஜவுக்கும் விசிகவுக்கும் இடையே மோதல் ஏற்பட்டது. இரு தரப்பினரும் ஒருவருக்கொருவர் கற்களை வீசித் தாக்கிக்கொண்டனர். உடனே அம்பேத்கர் சிலை மேடை மீது ஏறிய காயத்ரி ரகுராம் உள்ளிட்டோர் முழக்கங்களை எழுப்பினர். பதிலுக்கு விசிகவினருக்கும் முழக்கங்கள் எழுப்பினர். மோதலை முடிவுக்குக் கொண்டு வர காவல்துறையினர் மேற்கொண்ட சமாதானப்படுத்தும் முயற்சியும் கைகொடுக்கவில்லை. இதனால் அப்பகுதியில் பரபரப்பு ஏற்பட்டது. இதனைத் தொடர்ந்து, சென்னை இணை ஆணையர் ராஜேஸ்வரி மற்றும் அண்ணாநகர் துணை ஆணையர சிவ பிரசாத் ஆகியோர் விசிகவினருடன் பேச்சுவார்த்தை நடத்தியதை அடுத்து அவர்கள் கலைந்து சென்றனர். இதனைத்தொடர்ந்து மத்திய இணையமைச்சர் எல்.முருகன், பாஜக மாநிலத் தலைவர் அண்ணாமலை ஆகியோர் அம்பேத்கர் சிலைக்கு மாலை அணிவித்து மரியாதை செய்தனர்.
