பெங்களூரு அணியை வென்றது பஞ்சாப்!

பெங்களூரு அணியை வென்றது பஞ்சாப்!

15ஆவது ஐபிஎல் டி20 கிரிக்கெட் தொடரின் 60ஆவது லீக் ஆட்டத்தில், பாப் டு பிளிஸ்சிஸ் தலைமையிலான ராயல் சேலஞ்சர்ஸ் பெங்களூரு அணி, மயங்க் அகர்வால் தலைமையிலான கிங்ஸ் லெவென் பஞ்சாப் அணியுடன் மோதியது. நேற்று மாலை 7.30 மணிக்கு மும்பை பிராபோர்ன் மைதானத்தில் நடைபெற்ற இந்த ஆட்டத்தில் 30ஆவது முறையாக இரு அணிகளும் நேருக்கு நேர் எதிர்க்கொண்டன. டாஸ் வென்ற பெங்களூரு அணி கேப்டன் பாப் டு பிளிஸ்சிஸ் பந்து வீச்சை தேர்வு செய்தார். இதனைத்தொடர்ந்து முதலில் களம் இறங்கிய பஞ்சாப் அணி 20 ஓவர் முடிவில் 9 விக்கெட் இழப்புக்கு 209 ரன்கள் எடுத்தது. பின்னர் விளையாடிய பெங்களூரு அணியால் 20 ஓவர் முடிவில் 9 விக்கெட் இழப்புக்கு 155 ரன்கள் மட்டுமே எடுக்க முடிந்தது. இதனால் பஞ்சாப் அணி 54 ரன்கள் வித்தியாசத்தில் பெங்களூரு அணியை வீழ்த்தி தனது 6ஆவது வெற்றியை பெற்றது. இதுவரை இந்தத்தொடரில் 13 போட்டிகளில் விளையாடியுள்ள பெங்களூரு அணி 7 போட்டிகளில் வெற்றியும் 6 போட்டிகளில் தோல்வியையும் சந்தித்து புள்ளி பட்டியலில் 4ஆவது இடத்தில் உள்ளது. அதேசமயம், பஞ்சாப் அணி விளையாடிய 12 போட்டிகளில் 6 போட்டிகளில் வெற்றியும் 6 போட்டிகளில் தோல்வியையும் சந்தித்து புள்ளி பட்டியலில் 6ஆவது இடத்துக்கு முன்னேறி உள்ளது.